A Xunta suma unha nova aceleradora á súa rede, centrada no impulso de proxectos de economía social

Mércores 30 de Xaneiro de 2019

A Xunta suma unha nova aceleradora á súa rede, centrada no impulso de proxectos de economía social

• O conselleiro de Economía, Emprego e Industria, Francisco Conde, asistiu esta mañá en Vigo ao Startup Day, no que se seleccionarán un total de 18 iniciativas
• Os proxectos que accedan á seguinte fase entrarán nun programa de catro meses de duración no que recibirán formación, titorización e apoio para conseguir financiamento, todo elo adaptado ás peculiaridades propias da Economía Social
• Trátase dun sector estratéxico para Galicia formado por 3000 entidades que xeran 14.500 traballos directos e para o que a Xunta deseñou unha Estratexia que pretende incrementar, ata 2021, tanto as entidades como os empregos
• Hoxe abre o prazo de solicitudes para participar no programa Aprol Economía Social que destinará 2M€ para beneficiar a 60 entidades e 150 persoas

O conselleiro de Economía, Emprego e Industria, Francisco Conde, asistiu esta mañá en Vigo, ao Startup Day da aceleradora Es-Conecta -enmarcada nun proxecto transfronteirizo no que participa a Eurorrexión Galicia Norte de Portugal- onde asegurou que Galicia suma, así, unha nova aceleradora á súa rede StartIN. O elemento diferenciador é que está centrada na economía social con proxectos de empendemento que teñen como protagonistas ás persoas.

No Startup Day, seleccionaranse os 18 proxectos que pasarán á seguinte fase e que, polo tanto, accederán a un programa de catro meses no que se lles ofrecerá formación específica tanto individual como colectiva, sesións de titorías e mentorización, networkings e mesas redondas para o intercambio de experiencias e apoio e asesoramento para acceso a financiamento. O obxectivo é ofrecer aos participantes a preparación e coñecementos precisos que lles permitan reducir o tempo de posta en marcha e a consolidación do seu proxecto para desenvolvelo con garantía de éxito. Así, adáptase ás peculiaridades propias dos proxectos de economía social, primando as iniciativas centradas nas persoas e na sociedade.

Conde destacou que se trata dun sector estratéxico: “Queremos que sexa un elemento vertebrador da economía galega”. De feito conta con 3000 entidades que xeran 14.500 postos de traballo directos. O conselleiro referiuse á Estratexia da Economía Social coa que se poñerán en marcha 25 medidas cun investimento de 73M€ para aumentar nun 10% as entidades de economía social activas e un 20% os empregos vencellados.

Neste sentido, hoxe abre o prazo para o programa Aprol Economía Social co que se pretende incentivar ás cooperativas e sociedades laborais para que incorporen novos socios e axudar ás persoas desempregadas para que traballen con carácter indefinido neste tipo de entidades. Destinaranse 2M€ para beneficiar a 60 entidades e 150 persoas.