edg2030 - participa

Queremos coñecer a túa opinión

Participa!

Déixanos a túa opinión no foro aberto de cada un dos desafíos concretos que te propoñemos:

Cales son as xestións ou necesidades que che gustaría resolver online?

Na actualidade realizar xestións desde o teu fogar e a calquera hora é posible grazas ás tecnoloxías dixitais, superando así distancias físicas para comprar na nosa tenda favorita ou para acceder a servizos vinculados á nosa saúde, trámites coa Administración, etc.

Axúdanos a coñecer os principais beneficios que esperas dos servizos públicos dixitais (administración, sanidade, ...) e como poden mellorarse para  que dean unha mellor resposta ás túas necesidades e resulten máis fáciles de empregar.

Como facer a todos os galegos partícipes da nova sociedade dixital?

Avanzamos cara un novo paradigma de sociedade onde todo está conectado e as tecnoloxías se fusionan, asistindo a cambios constantes que orixinan novas formas de vivir, de traballar, comunicarse ou relacionarse. Para que ningún galego quede relegado é necesario que conten co conxunto axeitado de habilidades e coñecementos dixitais que lles permitan desenvolverse plenamente tanto na súa vida persoal como profesional.

Indícanos a continuación as túas propostas para converter aos galegos en usuarios avanzados das TIC e preparar as xeracións futuras para os novos empregos dixitais.

Como fomentar a confianza dixital para que as vantaxes das tecnoloxías dixitais cheguen ao conxunto da sociedade?

Froito da continua evolución tecnolóxica estamos a incorporar de forma progresiva novos produtos e servizos dixitais á nosa vida cotiá que fan crecer de forma exponencial o volume, velocidade e variedade dos datos xerados. Neste contexto, o cidadán convértese nunha parte fundamental da cadea de seguridade da información determinando en gran medida a capacidade das TIC para actuar como motor da innovación económica e social.

A ciberseguridade é unha responsabilidade compartida nos fogares, escolas e por suposto tanto no sector empresarial como na Administración. Achéganos a túa visión sobre como potenciar a seguridade e a confianza no ámbito dixital para que todos os galegos fagan un uso cada vez máis sofisticado das TIC.