A directora da Axencia Galega para a Modernización Tecnolóxica de Galicia (Amtega), Mar Pereira, e o director de Telefónica en Galicia, Manuel Alonso, asinaron en Santiago de Compostela o pasado 20 de xullo de 2012 un convenio de colaboración para mellorar a cobertura móbil en zonas urbanas e nas principais vías de comunicación galegas.

Este convenio forma parte dos compromisos adquiridos por Telefónica no marco do Plan de Banda Larga de Xunta de Galicia -onde a Compañía dispón de máis de 1.000 estacións base e unha porcentaxe de cobertura da poboación do 99%-. No marco deste compromiso, Telefónica xa realizou diferentes actuacións nestes últimos meses, cuxos resultados son xa visibles en varios puntos da AP-9, onde se detectaran problemas de cobertura que a miúdo teñen que ver con dificultades administrativas para instalar as estacións base. Neste sentido, no convenio rubricado, indícase que dende a Xunta se facilitará, na medida do posible, a interlocución con aquelas administracións coas competencias de autorización precisas para que Telefónica poida levar a cabo as intervencións requiridas.

Pola súa banda, Telefónica continuará os traballos iniciados para mellorar a calidade da cobertura en puntos das principais vías de comunicación e cidades galegas, que se irán fixando nas sucesivas comisións de seguimento do convenio.