O Centro Demostrador TIC amosou este ano a oferta tecnolóxica galega a máis de 250 empresas de diversos sectores produtivos

Domingo 30 de Decembro de 2012

O Centro Demostrador TIC amosou este ano a oferta tecnolóxica galega a máis de 250 empresas de diversos sectores produtivos

O Centro, que constitúe un punto de encontro entre a oferta TIC e a demanda tecnolóxica do tecido empresarial galego, presentou este ano máis de 30 solucións tecnolóxicas

Máis de 650 profesionais dos sectores educativo, sociosanitario, agroalimentario e do comercio, entre outros, asistiron ás súas actividades

O MapaTic.gal, a plataforma web do Centro, conta xa con 197 provedores TIC galegos rexistrados que ofertan máis de 390 solucións tecnolóxicas

Entre o seu equipamento punteiro o Centro Demostrador TIC alberga, dende o verán, un dos primeiros despregamentos piloto de tecnoloxía 4G de España

O Centro Demostrador TIC (CDTIC), que ten como obxectivo amosar aos sectores produtivos como as novas tecnoloxías poden mellorar a súa competitividade, acolleu durante este ano 2012 dezasete sesións demostradoras nas que participaron máis de 250 empresas dos sectores agroalimentario, sociosanitario, de comercio, do ensino e da automoción. Os asistentes puideron coñecer de primeira man máis de trinta solucións tecnolóxicas específicas que o sector TIC galego pon ao seu servizo.

Outro dos obxectivos do Centro Demostrador TIC é o de formar e capacitar ás pemes e micropemes galegas nas novas tendencias tecnolóxicas. Así, durante o 2012 o CDTIC ofertou por primeira vez, desde que comezara a súa andaina en xullo de 2011, máis de 150 horas de formación especializada a través de 15 talleres, onde os asistentes puideron adquirir coñecementos sobre Cloud Computing, Aplicacións para Smartphones, comercio electrónico, redes sociais como ferramenta de marketing dixital e as últimas novidades sobre realidade virtual e aumentada.

En total, máis de 650 profesionais participaron nas actividades levadas a cabo no CDTIC, o que supón un incremento relativo do 63% no segundo semestre de 2012 con respecto ao mesmo período do ano anterior, xa que o CDTIC entrou en funcionamento en xullo de 2011. 

Tanto os profesionais como empresas TIC galegas que teñen participado nas actividades do CDTIC, indican un grao de satisfacción superior a 4 nunha puntuación sobre 5, o que da conta da boa acollida que o Centro Demostrador TIC está a recibir entre as pemes galegas.

Mapa de Capacidades Tecnolóxicas de Galicia. MapaTIC.gal

Outro alicerce dos servizos que o CDTIC ofrece é o MapaTIC.gal (https://cdtic.xunta.es/mapatic/index.php). Plataforma que naceu a principios de 2012 co obxectivo de establecerse como un punto de encontro virtual entre os diferentes actores que participan na Oferta-Demanda Tecnolóxica de Galicia.

Actualmente, a plataforma web facilita unha ampla visibilidade ao sector TIC chegando a unha media de case 1000 visitas mensuais nos últimos catro meses e na que se pode atopar información sobre 197 provedores galegos de tecnoloxía que ofertan máis de 390 solucións tecnolóxicas.

As Solucións de xestión empresarial (37%) e os Servizos de auditoría e consultoría tecnolóxica (43%) compoñen a meirande parte da oferta tecnolóxica no MapaTIC.gal. Así dentro do primeiro grupo, dentro da ampla gama de produtos ofertados, os usuarios poderán atopar ERPs (37%), plataformas de comercio electrónico (8,11%), aplicacións de xestión administrativa e financeira (5,41%) ou aplicacións de xestión da loxística (Xestión de Almacén,  Xestión de rutas e flotas) (4,50%), entre outros.

Dentro dos servizos tecnolóxicos ofertados, os usuarios poden atopar tamén servizos de consultoría tecnolóxica integral (24%), consultoría en seguridade da información (16%), consultoría Legal e de Propiedade Intelectual (16%) e consultoría de marketing (9%) entre outros.

Primeiro punto de acceso en Galicia a tecnoloxía LTE 4G

O Centro Demostrador TIC alberga, dende xullo do 2012, un dos primeiros despregamentos piloto de tecnoloxía LTE, tamén coñecida como 4G, a nivel estatal, grazas a colaboración entre Telefónica e a Axencia de Modernización Tecnolóxica de Galicia (AMTEGA) no marco dos compromisos adquiridos polo operador dentro do Plan de Banda Larga.

Este punto piloto de acceso á tecnoloxía 4G, é un dos primeiros do Estado, o que supón un excelente equipamento sobre o cal empresas do sector TIC galego poden levar a cabo demostracións e probas dos seus desenvolvementos.

Centro Demostrador TIC

O CDTIC, promovido pola Axencia para a Modernización Tecnolóxica de Galicia, ten como obxectivo facilitar ás empresas do sector tecnolóxico os medios para achegar a súa oferta de produtos ás empresas doutros sectores produtivos. O Centro constitúe un punto de encontro entre a oferta TIC e a demanda tecnolóxica do tecido empresarial galego.

Deste xeito, as empresas TIC poderán desenvolver solucións innovadoras adaptadas ás necesidades de mercado de empresas doutros sectores produtivos, que coñecerán os produtos TIC máis adecuados para optimizar os seus negocios e terán a oportunidade de trasladarlles demandas concretas ás empresas do ámbito tecnolóxico.

O Centro Demostrador TIC de Galicia é froito dun convenio de colaboración entre a Xunta de Galicia e o Ministerio de Industria, Energía y Turismo.